geheim 5
Bienestar

Sekreto #5: E muher cu konfiansa…

Sekreto #5: E muher ku konfiansa den su mes no ta kompará su mes ku otro hende!

Si bo ta kompará bo mes konstantemente ku otro hende, e ora ey bo no ta un hende ku konfiansa den su mes.

Pa kon bon ku bo ta mustra i pa kuantu talento bo por tin, kon sabi òf eksitoso bo por ta, semper lo tin un hende ku ta mihó. I tardi òf tempran lo bo topa e persona ei.

E eskritor ta kere ku tin konfiansa den bo mes ta hasi lo mehor posibel di lokual bo ta. Bo no tin ku kompará bo mes ku otronan òf kompetí ku otro hende. Nos felisidat no ta bini di puntra e pregunta si nos ta mas mehor ku otro hende. Bo ta eksperensiá satisfakshon si bo a hasi bo bèst. Ta un kansansio pa semper bringa di ta number unu. Eigenlijk esaki ta imposibel.

Trahadónan di propaganda ke tenta hende pa hende kompetí ku otro. Ken ta bisti mas mehor, ken tin mas tantu kos i ken ta mas mehor den lokual nan ta hasi. Por ehèmpel: si bo kumpra e outo aki, bo ta number unu. Si bo kumpra e marka di paña aki, hende lo atmirabó. Kuminsá e diet nobo aki, ya asina bo ta baha di peso. E ora ei tur hende lo aseptá bo i mira bo. E mundu aki ta duna nos konstantemente e sentido ku nos mester ta otro hende i ku tin un produkto, un programa òf ku nos tin ku biba segun sierto normanan pa yega na esei.

Meskos ku hopi otro hende e eskritor a trata di ta manera su bisiña, su kasa, su amiga. Su bisiña ta hopi kreativo. Pero e eskritor apénas por a kose un boton na paña sin tin miedu ku e boton lo kai.. E la tuma lès pa siña kose, pero alabes e tabatin rabia riba kosementu.

E eskritor semper tabata bezig ku kompará su mes ku otro hende. E no a ripara ku e ta bezig ta ninga kon Dios a krea e. Despues di hopi aña di miseria e eskritor a realisá ku Dios no a hasi un eror. Dios a intenshonalmente krea nos diferente anto esei no ta nada malu. Dios ta laga nos mira su kreatividat. Den Salmo 139 ta siña nos ku Dios a forma nos den skochi di mama. Dios no a hasi un eror. Pues nos tin ku aseptá ku nos ta Dios su kreashon. E por yuda nos ta e úniko i un ser balioso ku e intenshon ku e a deseá.

Konfiansa den bo mes kiermen aseptá bo mes manera bo ta. Esei ta solamente posibel ora bo kere den e amor di Dios i e plan ku e tin pa bo bida. E eskritor ta kere ku bo ta insultá Dios si konstantemente bo ta kompará bo mes ku otro hende i ke ta manera otro hende. Tuma e desishon pa no kompará bo mes nunka ku otro hende. Apresiá otro hende i disfrutá di kon bo mes ta.

Naturalmente un hende por ta ehèmpel pa un otro. Pero nada mas ku esei. No envidia kosnan di otro hende. Dios no ke pa nos aktua asina. Nos ta wòrdu forma pa ta manera Hesus. Nos ta bai parse. Otro teksto den beibel(1 Kor 2:16) ta bisa ku nos mester konosé e pensamentu di Kristu. Nos por siña pensa, papia i aktua manera Kristu. Kristu no a kompará su mes nunka ku otro hende. Ela deseá semper di ta manera su tata a krea e. Ela biba pa hasi e boluntat di su tata.

E eskritor ke motivá bo pa ta felis ku ken bo ta. Esei no kiermen ku bo no por trata na mehora bo mes, pero si bo ta obsesivamente bezig di ta manera otro hende, lo bo wòrdu desapuntá kontinuamente.

Dios lo no yuda bo nunka di ta manera otro hende. Pensa ku ser “OTRO” ta juist bon. Selebrá e feit ku bo ta “UNIKO”. Ser kontentu ku lokual bo futuro por ta trese p’abo.. Dios tin plannan ku bo.

Esei bo por ta sigur di dje, pues kuminsá disfrutá di bo mes!!!

Leave a Reply

Your email address will not be published.