Bebi: Desarojo Di Un Bebi Den Su Di 5 Luna

Aki nos ta trese pabo un par di punto tokante desarojo di un bebi den su di 5 luna.

Tene na kuenta ku e puntonan di desarojo di un bebi ku nos ta pone riba nos pagina no ta pa tur bebi igual. Paso no ta tur bebi ta desaroja mes lihe of mescos.

Den e di 5 luna di un bebi

Den e periodo di 5 luna di bo bebi e por bai strek su manan mas tantu. E lo bai trata na mishi ku bo kabeinan. Su kabes lo e por tene na laria ora ku e ta sinta. E lo bai trata na lora i keda riba su zei. E por hasta bai kuminsa gatia. Aworaki lo e por tene obhetonan mihor den su manan. Pues tene na kuenta ku e ta bai mishi ku mas tantu kos den kas.

Medidanan di seguridat ku bo por tuma ta:

• Stopcontact: tapa stopkontact nan pa preveni ku e bebi por hinka su dede aden
• Hukinan skerpi: na hukinan skerpi na un mesa bo por pone un protector di huki. Ja asina ora e trata na tene na un punta di mesa pe para anto e kai anto bolbe lanta, e no dal su kabes na e punta di mesa.
• Porta: tene portanan sera of pone protektornan di porta of scharnier na e porta. Ja asina e bebi no ta pone su dedenan meimei di e porta
• Bentana: for di e momentu ku e bebi por subi riba kosnan e por subi pa wak dor di un bentana i e por kai pafo. Si bo tin bentana ku ta schuif, wak pa e no ta kompletamente habri
• Trapi: trapi den kas tambe por ta un peliger pa e bebi. Wak si bo por pone un heki na e trapi
• Mata: pone mata un kaminda ku e bebi no por jega. Sierto blachinan di mata ta venenoso. I si e hinkele den su boka, esai por bira un problema.

Un bebi di ongeveer 5 luna ta experimenta ku su boka dor di saka belnan for di su boka. E lo bai saka blaas for di su boka. E ta saka su lenga for di su boka anto hasi sonidonan stranjo. E por distingi awor tambe si bo ta positivo of negativo. E por bira den e temporada aki “eenkennig”. E lo ke ta mas tantu ku abo i menos ku hende stranjo.

Si lokual nos pone riba nos pagina ta un poko diferente di lokual ku bo zuster, opstetra of ginekologo a bisabo, nos ta konsehabo pa sigi e konseho di nan. Nan konose bo situashon mas mihor. Y no ta tur desarojo di un bebi ta e mesun kos!